వానలో ఎన్ని కోణాలు

వానలో ఎన్ని కోణాలు
చీకటిలోకి నడుస్తూ
మెత్తగా కురిసిన వాన
రాత్రి వెలుతురు
క్రీనీడల చివర్లో మంతనాలు
ఎంతకు తెగని సంప్రదింపులు
మధ్యలో అరుపులు
కొంచం దూరంగా
పార్కులో ఒంటరి బెంచీలు
ఆగకుండా ఊగి ఆగిపోయిన ఉయ్యాలలు
ఇక టైం అయిపోయింది అని గేట్ వేస్తున్న వాచ్మెన్
వారగా రాత్రి గడిపే దానికి తెచ్చుకున్న పొట్లాలు సీసాలు

మళ్లీ వాన ఈసారి ముద్ద ముద్దగా
ముఖాన్ని అద్దిపోతోంది
జలధారతో మనస్సుని శుద్ధి చేస్తోంది
చెట్టు కొమ్మల లోంచి చిక్కటి బొట్లు
ఆకులమీద అంచులమీద నిలిపే ప్రయత్నం
కాలువ కట్టి జారుతోంది

చెట్ల ప్రక్కన గొడుగు క్రింద చిన్న పిల్లలు
ఆట ఆగిపోయింది
ప్రకృతి పాట మొదలయ్యింది
చినుకు చినుకు మధ్య మెరుపు
కళ్ళను చమక్కు అనిపించి మాయమైతే
ఆధునిక లేసర్ షోని తలపిస్తూ
ఆకాశంలో తారల విలాపాలు

నగరం వానని చూసి వదిలేస్తూ ఉన్నది
వెచ్చటి దుప్పటి లోపల నిద్ర పోతూ వుంది
తెల్లవారితే వాన వదిలేసిన ఛాయ
ప్లాస్టిక్ సీసాలు పాత కాగితాల క్రింద
వాన ఆనవాళ్లు.
An inspiration after T.S.Eliots poem Preludes